Makalu

Burina a shekarar 2020: Saurare na ya fi magana ta yawa

  • Masana sun ce daga cikin abubuwan da suka sa dan Adam yin galaba a kan sauran halittu shi ne yadda yake iya hada kai. Don mutum shi kadai ba zai iya gwada karfi da zaki ko giwa ba. Amma idan ya hada karfi da sauran ‘yan uwansa babu kalubalen da ba za su iya tinkara ba.

    Hadin kai kuma ba ya tabbata sai da yarda, kuma yarda sai da mu’amala.

    Masu hikimar magana sun ce, Allah Ya halicce mu da kunne biyu, ido biyu amma sai ya yi mu da baki daya domin mu kalla, mu kuma saurara fiye da yadda muke magana. 

    Amma sai ya kasance cewa mun fi son yin magana fiye da saurare. Sau da yawa idan muna tattaunawa da wadansu ba ma mayar da hankali kan abin da ake fadi. Kawai jira muke mutum ya kai aya - idan ba mu katse shi ba kenan, domin mu fadi namu ra’ayin. Ga shi kuma ba mu son jin ra’ayoyin da suka sha bamban da namu. To ina za a samu fahimtar juna har a yi aiki tare? 

    Babu wanda rayuwarsa iri ɗaya da ta wani, kowa da irin  jarabawar shi,  kowa kuma da irin ta shi fahimtar. Ba lallai ba ne hange na  ya zo ɗaya da na ka. Ba lallai ba ne kowa yayi imani da abin da na yi imani da shi. Yadda kake ji da addininka haka wani ma haka yake ji da nasa amma don ra’ayinmu ya sha bamban ta wani gefe ba lallai ba ne a samu bambanci ta ko’ina. Akwai yiwuwar samun daidaito a wani fanni na rayuwa.

    Ba zan manta ba a lokacin da na je daukan rahoton zanga-zangar bijirewa kudirin haramtawa Musulmi shiga Amurka, da dama daga cikin wadanda suka fito kwansu da kwarkwatarsu don marawa Musulmi baya  ‘yan luwadi ne, duk da cewa sun san matakin Musulunci har ma da addinin Kirista a kan irin tsarin rayuwarsu. Da na nemi sanin dalilin fitowarsu, sai daya daga cikinsu ya ce ya fito ne saboda ya san zafin tsangwama da wariya saboda haka ba zai amince ya ga ana yi wa wani haka ba tare da ya yi wani abu ba. 

    Wannan ya bude min ido sosai, ko da ban amince da salon rayuwarsa ba, akwai wani abun karin ilmi da na koya. Ya nuna min cewa za ka iya jingine bambanci ko kyama domin a yi aiki tare kan wani abu muhimmi da ya shafi kowa.

    Don haka babu ruwana da girman kai wajen neman ilimi kuma babu ruwana da wata gardama don na san ba zan iya sauya wa kowa ra’ayi ba. 

    Kowa ka hadu da shi, ka dauke shi a matsayin wata dama na karin ilimi don watakila akwai wani abun da ya sani wanda kai ba ka san shi ba ko kuma a cikin musanyar ra'ayin ku, ka tsinci abin da bature ke cewa *“an aha moment”* wato karin haske kan wani ilimi na rayuwa. 

    Idan ka jingine na ka tunanin ka saurari ra’ayin da ya sha bamban da naka za ka ga koda ba ka amince da ra’ayin ba, za ka samu fahimtar dalilin da ya sa wannan mutumin ke da wannan ra’ayin. Hakan shi ma, karin ilimi ne. 

    A wannan zamani da muke fama da matsalolin da babu iyaka dole sai mun ajiye bambance-bambancen da muke da su, mun hada kai domin mu gudu tare mu tsira tare. 

    Don haka jama’a mu saurara fiye da yadda muke magana domin mu fahimci juna.

No Stickers to Show

X

MAKALU DA DUMI-DUMIN SU

  • Jini Baya Maganin Kishirwa: Babi na Uku

    Posted Jan 12

    Ku latsa nan don karanta babi na biyu. Sakinah ta share hawayen da ke zuba kan kuncinta kafin ta ce. "Insha Allahu Umma zan yi aiki da dukkan abin da ki ka umarce ni da shi da yardar Allah, ba zan taɓa baki kunya ba". "Yauwa Sakinah Allah ya yi miki albarka". "Amin"...

  • Yadda ake baked awara

    Posted Jan 11

    Barka da sake saduwa a cikin shirin girke-girkenmu na Bakandamiya. A yau na zo maku da sabon girki wato yadda za ku hada baked awara. Abubuwan hadawa Awara Kwai Carrots Seasoning Cooked minced meat Muffin tray Albasa Yadda ake hadawa Farko za ki yanka a...

  • Bayanan masana game da ingantattun hanyoyin ƙayyade iyali

    Posted Jan 8

    Mene ne ƙayyade iyali? Ƙayyade iyali ko tazarar iyali ko kuma family planning a Turance wani mataki ne da ma'aurata kan dauka don hana mace daukan ciki domin rage yawan haihuwa akai-akai, ko ƙayyade yawan ‘ya’ya da za ta haifa ko dai ma don wasu dalilai na ...

  • Ma'aurata: Babi na Biyu

    Posted Jan 8

    Idan baku karanta babi na daya ba to ku latsa nan don karantawa. Ana kiran sallah asuba ta farka daga bacci addu'an tashi daga bacci tayi kafin tayi miƙa tana salati ga Annabi S.A.W kai dubanta tayi a gefen da Fahad yake kwance tayi, har yanzu yana nan yana bacci kamar...

  • Burina a shekarar 2020: Saurare na ya fi magana ta yawa

    Posted Jan 4

    Masana sun ce daga cikin abubuwan da suka sa dan Adam yin galaba a kan sauran halittu shi ne yadda yake iya hada kai. Don mutum shi kadai ba zai iya gwada karfi da zaki ko giwa ba. Amma idan ya hada karfi da sauran ‘yan uwansa babu kalubalen da ba za su iya t...

  • Yadda ma’urata ya kamata su bullowa matsalolin rashin lafiya idan sun taso a rayuwar aure

    Posted December 31, 2019

    Matsalar rashin lafiya matsala ce babba da ke taka muhimmiyar rawa wajen hargitsa zamantakewa da rayuwar iyali. Ba abu bane da mutum daya zai boye ma kansa ba tare da sanin aboki ko abokiyar zama ba. Saboda matsala ce babba da take bukatar shawara, tattaunawa a tsakanin...

View All