Extended reality (XR) na daga cikin manyan fasahohin zamani da suka sauya yadda ɗan Adam ke mu’amala da bayanai, kwamfutoci, da kuma duniyar dijital. Wannan fasaha ta zo ne a matsayin amsa ga buƙatar samar da yanayi mai zurfi da kusanci tsakanin mutum da na’ura, fiye da abin da allon waya ko kwamfuta kaɗai ke iya bayarwa. XR ta buɗe wani sabon babi na fasaha inda iyakar da ke tsakanin duniyar da ta kama-da-wane ke fara ɓacewa a hankali, lamarin da ya sa ake kallon ta a matsayin ginshiƙin fasaha a nan gaba.
Ma’anar extended reality
Extended reality kalma ce da ake amfani da ita wajen haɗa dukkan fasahohin da ke ƙoƙarin faɗaɗa ko sauya yadda mutum ke gani da fahimtar duniyar zahiri ta hanyar na’urorin dijital. XR ba fasaha ɗaya ba ce, wani tsari ne mai haɗa hanyoyi daban-daban na kwaikwayon ko ƙara bayanan dijital cikin rayuwar yau da kullum. A ƙarƙashin XR ne ake samun fasahohi irin su virtual reality, augmented reality, da mixed reality, waɗanda dukkansu ke aiki da manufa ɗaya: samar wa mutane yanayi mai gamsarwa da haɗin kai tsakanin jiki, hankali, da muhallin dijital.
Dalilin bayyanar XR a duniyar fasaha
Bayyanar extended reality ta samo asali ne daga ƙoƙarin ɗan Adam na inganta hanyar mu’amala da fasaha. A farko-farko, hulɗa tsakanin mutum da kwamfuta ta taƙaita ne ga rubutu da hotuna a kan allo. Amma da cigaban fasaha, buƙatar samun yanayi mai zurfi, wanda zai fi kusanci da yadda mutum ke fahimtar duniyar zahiri, ya ƙaru sosai.
Haka kuma, bunƙasar wasannin dijital (digital games), horarwa a masana’antu, aikin likitanci, da ilimi sun haifar da buƙatar fasahar da za ta iya kwaikwayon yanayi, motsi, da mu’amala ta zahiri cikin sahihin tsari. XR ta bayyana ne domin cike wannan giɓin, ta hanyar bai wa mutum damar shiga cikin bayanai, ba wai kallon su daga nesa kaɗai ba. Wannan ya sa XR ta zama mafita ga matsalolin da tsofaffin hanyoyin fasaha suka kasa warwarewa.
Dangantakar XR da cigaban fasahar dijital
Extended Reality na da alaƙa kai tsaye da cigaban fasahar dijital gabaɗaya. Ba za a iya gina XR ba tare da dogaro da manyan ginshiƙai kamar saurin intanet, ƙarfin kwamfuta, bayanai masu yawa, da makamantansu ba. Cigaban fasahohi irinsu cloud computing, edge computing, da 5G zuwa 6G ya ba XR damar aiki cikin sauri da daidaito, ba tare da jinkiri mai yawa ba.
Bugu da ƙari, bunƙasar Artificial Intelligence ta taimaka wajen sa XR ta zama mai fahimtar motsi, murya, da halayen mai amfani, lamarin da ke ƙara mata armashi da amfani. A wannan ma’ana, XR ba fasaha mai zaman kanta ba ce, illa dai sakamakon haɗuwar cigaban fasahar dijital da dama, wanda ke nuna cewa duk wani cigaba a duniyar IT yana ƙara faɗaɗa ƙarfi da tasirin extended reality.
Tarihin cigaban extended reality
Tarihin extended reality ya samo asali ne daga dogon yunƙurin ɗan Adam na ƙirƙirar fasahar da za ta iya nutsar da mutum cikin wani yanayi na daban, ta yadda hankali da jijiyoyi za su ji kamar suna cikin zahirin wannan yanayi. Wannan buri bai bayyana lokaci guda ba, sai dai ya tashi ne a hankali tare da ci gaban ilimin kimiyya, kwamfuta, da fahimtar yadda hankalin ɗan Adam ke aiki. XR a yau sakamakon haɗuwar waɗannan dogayen matakai ne na bincike da ƙirƙira.
Ra’ayin immersive technologies ya fara bayyana tun kafin zuwan kwamfuta ta zamani. A ƙarni na ashirin, masana kimiyya da masu fasaha sun fara tunanin hanyoyin da za su sa mutum ya ji yana cikin abin da yake kallo, ba wai yana kallon shi daga nesa kaɗai ba. Wasu na’urori na farko sun haɗa da injinan kwaikwayon gani da sauti da ake amfani da su wajen horar da matuƙan jiragen sama, inda ake ƙoƙarin kwaikwayon yanayin tashi da sauka domin rage haɗari a ainihin aiki.
Da zuwan kwamfuta, wannan tunani ya samu sabon ƙarfi. Ƙaruwar ikon sarrafa hoto, sauti, da motsi ta hanyar dijital ta ba masana damar fara gina muhallai na kama-da-wane da ke karɓar motsin mutum. Wannan ne ya zama tubalin farko na dukkan fasahohin XR da ake da su a yau.
Cigaban virtual reality
Virtual reality ita ce fasaha ta farko da ta fi bayyana a fili a fagen immersive technologies. A shekarun 1960 zuwa 1980, an fara gwaje-gwaje kan na’urorin da ke rufe ido gabaɗaya domin kai mutum zuwa wata duniya ta kama-da-wane. A wancan lokaci, ƙarancin ƙarfin kwamfuta da tsadar kayan aiki sun sa VR ta kasance a matakin bincike da gwaji kawai, ba tare da yaɗuwa a tsakanin jama’a ba.
Daga shekarun 1990 zuwa farkon ƙarni na 21, VR ta fara samun cigaba a hankali, musamman a fannin wasanni, binciken kimiyya, da horarwa a masana’antu. Zuwa baya-bayan nan, bunƙasar graphics, motion sensors, da saurin intanet ya sa VR ta zama mai araha kuma mai inganci, lamarin da ya buɗe ƙofa ga amfani da ita a fannin ilimi, lafiya, gine-gine, da sauran fannoni.
Bayyanar augmented reality
Bayan VR, wata sabuwar hanya ta immersive technology ta bayyana wadda ba ta cire mutum daga zahirin duniya gabaɗaya ba. Wannan ita ce augmented reality, wacce ke ƙara bayanan dijital a kan abin da mutum ke gani a zahiri. AR ta fara samun karɓuwa ne musamman bayan bunƙasar wayoyin zamani, inda kyamara, GPS, da sensors suka zama ruwan dare.
AR ta ba da damar ganin bayanai, hotuna, ko alamomi na dijital a kan muhalli na asali, kamar taswira a kan titi ko bayanin wani abu ta hanyar kyamarar waya. Wannan salo ya sa AR ta zama mafi sauƙin shiga ga jama’a fiye da VR, domin ba lallai sai an yi amfani da manyan na’urori masu tsada ba.
Haɗakar fasahohi zuwa extended reality
Da lokaci ya ja, masana suka fahimci cewa VR da AR ba su zama fasahohi masu zaman kansu ba, face dai sassa ne na babban tsari guda ɗaya. Haka ne ya haifar da tunanin extended reality, wato kalmar da ke haɗa dukkan nau’o’in yanayin da ke tsakanin zahiri da kama-da-wane.
XR ta bayyana ne domin bayyana wannan haɗaka, inda ake kallon immersive technologies a matsayin tsari mai faɗi, ba takaitaccen nau’i ɗaya ba. A wannan yanayi, fasahohi daban-daban suna haɗuwa bisa buƙata, wani lokaci mutum na nutsewa gabaɗaya cikin duniya ta dijital, wani lokaci kuma ana ƙara bayanai ne kawai a kan zahiri. Wannan haɗaka ce ta haifar da sabon babi a tarihin fasaha, inda XR ta zama tushen haɗin gwiwa tsakanin mutum, na’ura, da bayanai.
Manyan rabe-raben extended reality
Extended eality ba fasaha guda ɗaya ba ce, wani babban tsari da ke haɗa hanyoyi daban-daban na kwaikwayon gaskiya da faɗaɗa kwarewar ɗan Adam ta hanyar dijital. Waɗannan hanyoyi sun bambanta ne gwargwadon yadda suke mu’amala da zahirin duniya da kuma yadda suke nutsar da mai amfani da su cikin muhalli na dijital. A ƙarƙashin XR ne ake samun manyan rabe-rabe guda uku: virtual reality, augmented reality, da mixed reality.
Virtual Reality (VR)
Virtual reality fasaha ce da ke maye gurbin zahirin duniya gabaɗaya da wata duniya ta kama-da-wane. A lokacin amfani da VR, mutum yana shiga wani muhalli na dijital ne ta hanyar na’urori na musamman, kamar gilashin VR da na’urorin sarrafa motsi, har ya kai ga hankalinsa ya rabu da abin da ke faruwa a zahiri. Wannan yanayi yana ba da damar jin kamar ana rayuwa a cikin wani wuri ko yanayi dabam, ko da kuwa wannan yanayin kwaikwayo ne na kwamfuta.
VR ta fi dacewa da ayyuka da ke buƙatar cikakkiyar nutsuwa, kamar wasanni (games) horarwa mai haɗari, binciken kimiyya, da kwaikwayon yanayi da ba za a iya gwada shi kai tsaye a zahiri ba. Abin da ya fi bambanta VR shi ne cewa tana katse hulɗa da zahiri, ta mayar da dukkan hankalin mai amfani zuwa duniyar dijital.
Augmented Reality (AR)
Augmented reality fasaha ce da ke aiki a kan zahirin duniya, ba tare da cire mutum daga gare ta ba. Maimakon ƙirƙirar sabuwar duniya gabaɗaya, AR tana ƙara abubuwan dijital kamar rubutu, hotuna, ko alamomi a kan abin da ido ke gani a zahiri. Wannan yana faruwa ne ta hanyar kyamarori, allon waya, ko gilashi na musamman.
AR ta fi mayar da hankali ne kan taimaka wa mutum fahimtar abin da yake gani ko aikatawa a zahiri ta hanyar ƙarin bayanai. Saboda haka, AR ta zama mai amfani sosai a fannoni kamar ilimi, gyaran na’urori, kasuwanci, lafiya, da zirga-zirga. Bambancin AR da VR shi ne cewa AR ba ta raba mutum da duniyar zahiri, tana ƙarfafa ta da bayanai na dijital.
Mixed Reality (MR)
Mixed Reality na tsaka-tsaki ne tsakanin VR da AR. A MR, abubuwan dijital ba nuna su ake a kan na zahiri ba kawai, har ma ana mu’amala da su cikin nutsuwa da tsari. Wannan yana nuna cewa abubuwan dijital na iya ganin muhalli na zahiri, su daidaita da shi, su kuma karɓi motsin mai amfani da fasaha ko abubuwan da ke kewaye da shi.
MR tana ba da damar haɗa zahiri da dijital cikin yanayi guda, inda iyakar da ke tsakaninsu ke raguwa sosai. Wannan fasaha tana buƙatar ƙarin ƙarfi daga na’urori da manhajoji, domin tana dogara da fahimtar sarari, motsi, da mu’amala a lokaci guda. Saboda haka, MR na amfani sosai a horarwa mai zurfi, aikin injiniyanci, ƙira, da ayyukan masana’antu.
Muhimman ginshiƙan fasahar XR
Extended reality tana aiki ne bisa haɗin kai tsakanin kayan aiki, manhajoji, da fasahohin da ke ba da damar sadarwa tsakanin mutum da dijital. Domin a samar da kwarewa mai gamsarwa da inganci, akwai wasu ginshiƙai da suka zama wajibi a fahimta, waɗanda suka haɗa da na’urori, manhajoji, na’urorin gano motsi, da amfani da Artificial Intelligence.
Na’urorin XR da kayan aiki
Na’urorin XR su ne tubalan farko da ke bai wa mai amfani damar shiga ko haɗa kai da duniyar dijital. Wannan ya haɗa da gilashin VR da AR, hular MR, da na’urorin haɗa kai irin su gloves masu gano motsi, controllers, da suits da ke lura da motsin jiki. Waɗannan kayan aiki suna da muhimmanci domin suna ba da damar ganin hotuna cikin tsarin 3D, jin sauti na kusa da nesa, da kuma kwarewar amfani da abubuwa a cikin muhalli na kama-da-wane. Ingancin kayan aiki yana da tasiri kai tsaye ga yadda mai amfani zai ji cikin XR, har ma da guje wa gajiya ko rashin jin daɗi yayin amfani.
Manhajoji da shafukan XR
Baya ga kayan aiki, manhajar XR ita ke sarrafa abubuwan da ake gani da hulɗa da su. Shafukan XR, kamar Unity, Unreal Engine, da ARKit/ARCore, suna ba da damar gina muhallai na kama-da-wane ko ƙara abubuwan dijital a kan zahiri. Manhaja ce ke haɗa bayanai daga na’urori daban-daban, tana sarrafa abubuwan gani da sauti, sannan ta tabbatar da daidaito a lokaci guda. Wannan ginshiƙi yana da muhimmanci domin XR ba wai na’ura kaɗai ba ce, tsarin haɗakar na kayan aiki da manhaja ne wanda ke samar da yanayi mai ma’ana.
Sensors, cameras, da motion tracking
Sensors, kyamarori, da na’urorin gano motsi su ne ke ba XR damar fahimtar yanayin mutum da kuma yanayin da yake ciki. Wannan ya haɗa da gyroscopes, accelerometers, depth sensors, da infrared cameras. Waɗannan fasahohi suna ba na’urorin XR damar gano wuri, motsi, da yanayin sarari, ta yadda abubuwan dijital za su iya aiki cikin lokacin da ya dace. Rashin waɗannan ginshiƙai na iya sa duniyar XR ta kasance marar daidaito ko ta yi jinkiri, wanda hakan zai iya rage gamsarwa da jin daɗi ga mai amfani da fasahar.
Rawar Artificial Intelligence a XR
Artificial Intelligence (AI) na taka muhimmiyar rawa wajen inganta XR. AI na taimakawa wajen fahimtar motsin mai amfani, yin hasashen ayyuka nan gaba, da ƙirƙirar abubuwan dijital masu karɓa kai tsaye. Haka kuma, AI na ba XR damar fahimtar sarari da yanayin da mai amfani ke ciki, har ma da daidaita abubuwan haskawa da sauti daidai da buƙata. A wasu lokuta, AI na taimakawa wajen samar da yanayi keɓantacce, inda abubuwan da ke bayyana a duniyar XR ke bambanta daga mutum zuwa mutum gwargwadon ayyukansu da halayensu.
Tsarin aikin extended reality
Extended Reality (XR) ba haɗa na’urori da manhajoji kaɗai yake ba, har ma tana buƙatar tsari mai ƙarfi wanda zai ba da damar gudanar da yanayi mai zurfi da daidaito. Tsarin aikin XR yana haɗa abubuwa daban-daban da ke tabbatar da cewa mai amfani yana jin kamar yana cikin yanayi na zahiri ko mai kama da zahiri, kuma yanayin na gudana cikin sauri da inganci. Wannan tsari ya ta’allaka ne ga immersive environments, mu’amala tsakanin mutum da kwamfuta, spatial computing, da kuma sarrafawa a lokaci na asali.
Immersive environments
Immersive environments na nufin yanayin dijital da XR ke ƙirƙira domin gamsar da mai amfani sosai cikin wani wuri ko yanayi. Wannan na iya zama cikakkiyar duniya mai kama da ta zahiri a VR, ko kuma ƙarin bayanai da abubuwa na zahiri a argumented reality, ko haɗakar abubuwa na zahiri da na dijital a fasahar mixed reality. Muhimmancin immersive environments shi ne cewa suna sa mai amfani ya ji kamar yana hulɗa da abubuwa da muhalli a zahiri, ta hanyar gani, sauti, da motsi. Ƙirƙirar wannan yanayi na bukatar haɗa kayan aiki, manhajoji, da algorithms cikin tsari mai dacewa.
Human–computer interaction
Human–computer interaction (HCI) a fasahar XR yana nufin yadda mai amfani ke hulɗa da tsarin dijital ta hanyar na’urori da manhajoji. Wannan ya haɗa da motsin hannu, hangen ido, murya, ko motsin jiki gabaɗaya. HCI a fasahar XR yana ƙara gamsarwa, saboda abubuwan da mai amfani ke yi suna haifar da hulɗa kai tsaye daga tsarin dijital. Ƙwarewa sosai da tsarin HCI na sa fasahar XR ta zama mai daɗi, mai sauƙin amfani, kuma tana rage gajiya ko rashin jin daɗi na jiki yayin amfani.
Spatial computing
Spatial computing fasaha ce da ke bai wa tsarin XR damar fahimtar sarari da yanayi da ke kewaye da mai amfani. Wannan yana nufin cewa abubuwan dijital suna ganuwa kuma suna daidaita da yanayin zahiri, kamar wurin da mutum ke tsaye, wuraren abubuwa na kusa, ko motsin mai amfani. Spatial computing na haɗa fasahohin sensors, cameras, da algorithms na AI domin aiwatarwa. Wannan ginshiƙi yana ba fasahar XR damar ba da yanayi mai kama da gaskiya, inda abubuwan dijital ke bayyana cikin tsari daidai da yanayin asali.
Latency, bandwidth, da real-time processing
Duk da kasancewar na’urori, manhajoji, da AI suna da muhimmanci, fasahar XR ba za ta iya yin aiki ba idan akwai jinkiri mai yawa ko rashin isasshen bandwidth. Latency yana nuna lokacin da ake ɗauka daga lokacin da mai amfani ya yi wani abu kafin tsarin ya karɓa. Bandwidth kuma shi ne ƙarfin hanyar sadarwa don watsa bayanai da sauri. Real-time processing yana tabbatar da cewa abubuwan dijital suna aiwatuwa kai tsaye, ba tare da jinkiri ba, domin ba da gamsarwa mai inganci. Haɗakar waɗannan abubuwa na tabbatar da cewa XR na aiki cikin sauri, daidaito, da jin daɗin mai amfani.
Alfanun extended reality a rayuwa.
Extended reality a wajen tsara birane
Extended Reality tana taka muhimmiyar rawa wajen sauƙaƙa tsara birane da gudanar da ayyukan more rayuwa. Ta hanyar argumented reality (AR) da mixed reality (MR), masu tsara birane da injiniyoyi na iya ganin yadda gine-gine, tituna, ko sauran abubuwan more rayuwa za su kasance kafin a fara gini. Wannan yana taimakawa wajen rage kuskure, ingantawa, da kiyaye albarkatu, domin duk wani abu da aka tsara a dijital na iya auna yadda zai yi aiki a zahiri.
Haka kuma, XR na inganta zirga-zirga da tsaro a birane. Ana iya amfani da kwaikwayon yanayi da bayanai na lokacin asali domin tsara hanyoyi, rage cunkoson ababen hawa, da kula da tsaro a wuraren jama’a. Masu lura da birane na iya yin kallo da gwaje-gwaje a cikin yanayin XR kafin aiwatar da ayyuka a zahiri, wanda hakan ke rage haɗari da kashe kuɗi marasa amfani.
Bugu da ƙari, XR na taimakawa wajen gudanar da ayyukan gwamnati, musamman a birane na zamani. Ana iya amfani da XR wajen duba yadda ayyuka suke tafiya, gudanar da tarurruka daga nesa cikin yanayin kwaikwayo, da sa ido kan ayyukan jama’a da na cibiyoyi. Wannan yana ƙara inganci, saurin aiki, da haɓaka hulɗa tsakanin gwamnati da al’umma.
Extended reality da tattalin arziki
Extended reality na samar da sabbin kasuwanni da masana’antu ta hanyar buɗe hanyoyi daban-daban na fasaha. Kamfanoni na iya ƙirƙirar sabbin samfura da ayyuka a duniyar dijital, kamar shagunan VR, wasanni masu gamsarwa, ko horarwa ta hanyar XR. Wannan yana ba da damar haɓaka tattalin arziki, musamman a fannoni da suka shafi fasaha da sabbin kasuwanni.
Haka kuma, XR na taimaka wajen bunƙasa digital economy, inda ake samar da kayayyaki da ayyuka ta yanar gizo cikin yanayi mai gamsarwa. Misali, kwastomomi na iya gwada samfuran kayayyaki kafin saye, ko shiga tarurruka na kasuwanci ba tare da barin gida ba. Wannan yana rage ɓata lokaci, kashe kuɗi, da haɗari, yayin da yake haɓaka cinikayya da haɗin gwiwa tsakanin kasuwanni da mutane.
Bugu da ƙari, XR na samar da sabbin ayyukan yi da ƙwarewa. Tare da buƙatar ƙwararrun masu ƙirƙirar bayanai, masu tsara yanayi na XR, da masu kula da na’urori da manhajoji. XR na ƙirƙirar dama ga matasa da ƙwararru a fannin aiki. Wannan yana ƙara bunƙasa ƙwarewa a fasaha, ƙirƙira, da gudanar da ayyuka masu alaƙa da dijital, wanda hakan ke haifar da sabbin hanyoyin samun arziki a zamani mai zuwa.
Kalubale da matsalolin extended reality
Fasahar extended feality na da fa’ida mai yawa, amma kuma tana fuskantar ƙalubale da matsaloli da suka shafi tsaro, lafiya, da tsadar fasahar. Ɗaya daga cikin manyan ƙalubale shi ne tsadar kayan aiki, inda gilashin VR, na’urorin AR, da hular MR ke da tsada da buƙatar ƙwarewa wajen sarrafa su. Wannan na iya hana yaɗuwar XR a tsakanin jama’a ko kasuwanni masu tasowa.
Matsalolin tsaro da sirranta bayanai
XR na tattara bayanai da yawa daga masu amfani da ita, kamar motsi, wurin da suke, da hulɗarsu da abubuwa na dijital. Wannan na iya haifar da barazanar tsaro da sirrin bayanai, musamman idan ba a tsara na’urori da manhajoji bisa tsauraran ka’idojin kare bayanai ba. Masu amfani na iya fuskantar satar bayanan sirri ko yin amfani da su ba bisa ƙa’ida ba.
Tasirin XR ga lafiyar jiki da ƙwaƙwalwa
Amfani da fasahar XR na iya shafar lafiyar jiki da tunani. Yawan amfani da VR na iya jawo gajiya, rashin daidaiton gani, ko rashin jin daɗi ga ido da kai. Haka kuma, nutsar da mutum gabaɗaya cikin duniya ta dijital na iya shafar hulɗarsa da jama’a, zamantakewa, halaye da ɗabi’u. Wannan na bukatar wayar da kai da ƙayyade amfani da fasahar domin rage illa ga lafiyar jiki da ƙwaƙwalwa.
Gibin fasaha tsakanin ƙasashe
Haɗa fasahar XR cikin rayuwar yau da kullum na bukatar kayan aiki, manhajoji, da tsarin intanet mai sauri. Wannan na nuna giɓin fasaha tsakanin ƙasashe, inda ƙasashe masu tasowa ke fuskantar ƙalubale wajen samun kayan aiki da horar da ma’aikata. Rashin wannan zai iya hana fasahar XR cim ma cikakken tasiri a duniya baki ɗaya.
Digital ethics da extended reality
Extended reality na da alaƙa sosai da digital ethics, musamman wajen kare bayanan masu amfani da tabbatar da gaskiya a kwaikwayon abubuwa. Masu amfani suna buƙatar sanin yadda bayanansu ke aiki a XR, yayin da masu ƙirƙira ke da alhakin tabbatar da cewa abubuwan dijital ba su kawo ruɗani ko rashin fahimta ga ɗabi’ar ɗan Adam ba.
Abubuwan da XR ke ƙirƙira na iya haifar da rudani tsakanin gaskiya da kwaikwayo. Wannan yana bukatar tsaro a hulɗa da abubuwa na dijital, da tabbatar da cewa mai amfani yana iya bambancewa tsakanin zahiri da kwaikwayon dijital.
XR na iya shafar zamantakewa da ɗabi’a, musamman ga matasa da masu amfani da fasahar sosai. Hakan na iya jawo karkatacciyar fahimta, rabuwa da jama’a, ko sauyin halaye na yau da kullum. Wannan na buƙatar tsare-tsare da wayar da kai domin rage tasiri marar kyau.
Manazarta
Amedei, D. (2022, November 11). Extended Reality: definition and meaning. Kiber.
Office of Advanced Research Computing. (n.d.). Extended Reality (Virtual Reality, Augmented Reality) | Office of Advanced Research Computing.
Lawal, A. (2026, January 30). Virtual reality | Bakandamiya.
Staff, C. (2025, December 30). What is extended reality? Coursera. https://www.coursera.org/articles/what-is-extended-reality
Sharuɗɗan Editoci
Duk maƙalun da ku ka karanta a wannan taska ta Bakandamiya, marubuta da editocinmu ne suka rubuta tare da sa idon kwamitin ba da shawara na ƙwararru. Kuma kowace maƙala da aka buga ta bi muhimman matakai na tantancewa don ganin cewa bayanan dake cikinta sun inganta.
Idan kuma an ga wani kuskure a cikin kowace maƙalarmu, a sanar da mu. Za mu yi bincike sannan mu gyara gwargwadon fahimtarmu.